السيسي للشباب: "هو أنا مابغرش على بلدي والقطر شكله كده؟"

قال الرئيس عبدالفتاح السيسي، إن أحد أهم أسباب تراجع قدرات الدولة وخدماتها التي تقدم للمواطنين، هي أن الدولة لم تكن تستطيع أن تحصل على المقابل لهذه الخدمة وبالتالي تراجعت.

وأضاف السيسى خلال مداخلته بالمؤتمر الوطني للشباب المقام بمحافظة أسوان، "أنا عاوز دايما واحنا بنتكلم على العطاء نتكلم على إن احنا مستنيين ايه مقابل من الناس، مهم قوى إن إحنا نوضح ده للرأي العام في مصر، وان الخدمة قدام منها مقابل، ولو المقابل ده مجاش الخدمة هاتدهور وهاتنتهي، الخدمة لو ماكنش هايدفع لها المقابل الحقيقي مش الثمن المدعم ده، بنقول بشفافية ومصداقية وبوعي اللى أنت بتتكلم عليه ده تكلفته 4 مليارات دولار تقريبا دول بكام وعلشان المحطة دي تشتغل بكام علشان تقدر تشتغل طول السنة، طيب يا ترى المقابل ده هانقدر نحصل عليه ولو مقدرناش هاندفعه منين؟

وتابع:" ممكن قوى نتكلم على اننا من 2014 بتحرك بفعالية لكن أمانة الكلام معاكم يا مصريين بقولكم إن الحكاية مش كده، الدولة كانت بتقدم خدمة للناس ولا تحصل على المقابل لها فكانت تتدهور، احنا بنتكلم على مرفق السكة الحديد تقريبا يحتاج 180 مليار جنيه لإعادة تأهيله وماتقدرش تزود قيمة التذكرة، طيب هذا المرفق سيكون شكله إيه هايبقى القطار شكله عامل إزاى"

 وأضاف "هو أنا مابغرش على بلدى والقطر شكله كده؟"، إذا لم نحصل على القدر اللى إحنا مخططينه على الاقل من المقابل ده مش هايكون لصالحنا".